-
- © SanneBerg/iStock
Eit bilete teke i farta? Neppe! Her er alt planlagt til minste detalj. Med selfiestong som matchar mobilen, blir ein nøye innstudert trutmunn og eit nøye innstudert blikk fanga inn i kamera.
-
- © Hyacinthe Rigaud [Public domain], via Wikimedia Commons
Solkongen, Ludvig XIV, av Frankrike poserer i all si prakt, mens folket hans svelt. Som i ein selfie viser eit måleri berre eit utsnitt av røyndommen, og du kan fortelje den historia du sjølv ønskjer at andre skal lytte til. Her har kunstnaroppdraget vore å vise fram kongen som ein mektig herskar. Sjå godt på portrettet av Solkongen – kva viser kongemakta?
Kven er du, og korleis ønskjer du at verda skal sjå deg? Menneske har vore opptekne av dette i alle år, og kanskje tenkjer du nøye gjennom korleis du ser ut, og kva som er i bakgrunnen når du tek ein selfie? Teiknarar, skulptørar og målarar har portrettert menneske slik at det har passa med ideal i tida.
I denne modulen blir du utfordra til å prøve deg som kunsthistorikar og bli betre kjend med visuelle verkemiddel. Teikneferdigheitene dine kan bli sette på prøve når du skal fange kroppspositurar på papiret i løpet av få minutt. Du blir også utfordra til å kombinere gamle ideal med noko du kjenner godt frå før – selfien. Ved hjelp av mobilkamera eller eit nettbrett kan du gjenskape eit portrett frå kunsthistoria og lage din eigen artfie.
Ordforklaringar
portrett: Eit bilete som skildrar ein bestemt person. Skildringa kan givast att i teknikkar som foto, måleri eller teikning.
selfie: Sjølvportrett teke med digitalt kamera eller mobilkamera. Blir ofte delte i sosiale medium for å fortelje kva ein gjer, eller vise korleis ein ser ut.
Kompetansemål
- analysere hvordan identitet og stedstilhørighet kommuniseres i arkitektur, klestradisjoner, kunst eller gjenstander, og integrere kulturelle referanser i eget skapende arbeid
- reflektere kritisk over visuelle virkemidler og eksperimentere med ulike visuelle uttrykk i en skapende prosess